اولو تانرینین آدیایله
گونوموزده بیرسیرا ندنلر اوزهره دیلیمیزین داها سورعتلی گلیشمهسی اوغروندا مانعلر تؤرهنیلمیشدیر! [...] مسئلهیه اؤته یاندان یاناشدیغیمیزدا بو مانعلرین بیرباشینین سیاستدن سو ایچمهسی ده نظره گلیر!!
آنادیلینه اؤنم وئرن هربیر یازار، اؤیرهنجی، درگیلریمیز و قزئتلریمیز بیر شئی یازماق ایستهدیکلرینده بو مسئلهیه [...] وظیفه کیمی یاناشیرلار. آرتیق تورکجهمیزده دوزگون یازیب اوخوماق باجارمایان وطنداشلاریمیز بیله بو وظیفهنی اؤدهمهیه ماراق گؤستهریرلر. ایمکانلاریمیزین آز اولماسینا باخمایاراق دیلیمیز اوغروندا بؤیوک آددیملار آتمالیییق.
چئورهمیزه باخدیغیمیزدا بیر چوخ شاعیرلرله یازارلاری و اونلارین تورکجهمیزده یاراتدیغی اثرلرینی گؤروروک آنجاق بو دوروم بیریاندان بیزی سئویندیریرسه اؤته یاندان قورخولو یؤنوده وار! او دا مکتبسیز بیردیلده یازیب یاراتماغین اؤنوموزه چیخان حدسیز- حئسابسیز یازی یانلیشلیقلاریدیر. بو دا طبیعیدیر. بیز دیل یوللارینین بیرینجی منزیلینی آشمادان اؤنجه اورتا منزیله کئچمیشیک! دولاییسییلا «نجور گلدی یاز گئتسین» بیر یازی اوسلوبو اورتایا چیخیر!!
کیمیلری خالق دیلینده ایشلهکی آز اولان سؤزجوکلری قوللانماقلا حال ائلهییر!! کیمیلری ایستانبول تورکجهسیندن سؤزوجوکلرینی آلیب فارسجانین قیرامئری اساسیندا یازیر! کیمیلریایسه اؤز کندلرینین لهجهسینی دونیایا یایماق ایستهییر!
کسینلیله بو دیل آلینما سؤزلردن تمیزلنمهلی، دوزگون قیرامئری اساسیندا یازیلمالیدیر. بو دوروما دا ایلکین شرط مئعیار دیلین گئرچکلهشمهسیدیر. مئعیار دیل، یازیلاریمیزی لهجهلره ساری یؤنهلمکدن اوزاقلاشدیریر. دیلین بوتون جنبهلرینی ائتکیلهییر. آلینما سؤزلرین یئرینی یئنی سؤزلرله دهییشمهیه اویغون شراییط یارادیر. دیلده اولان هربیر یئنیلییی قایدالار چرچیوهسینده گلیشدیریر.
دیلیمیزی یایماق اوچون اؤنهملی آراجلاردان بیری ده اینتئرنئتدیر. بو مجازی دونیانین یاراتدیغی ایمکانلارینا گلدیکده یئنه ده موثبت و منفی یؤنلرینی گؤزدن کئیچیرمهلیییک. بیر چوخ مئدیالاردا گئده بیلمهین یازیلاریمیز اینتئرنئتده یاییلدی. اینتئرنئت، دیل یاساقلیغینین آجیسینی آزالتدی. بعضیلرینه گؤره اؤلوم حالینا گلیب چیخان دیلیمیزی یئنیدن جانلاندیردی. منفی یؤنو ایسه اونون نظارتسیز اولماسی و اوردا هر یازینین گورول-گوپباز کئچمهسیدیر!. بو دا بیزی همن شفاهی دانیشیقلاریمیزا گتیریب چیخارا بیلر. اینتئرنئتده باجاریقلی و تجروبهلی یازارلار بیله تلهسیب اولدوقجا یازیلارینی گؤزدن کئچیرمیرلر. بو مجازی دونیا دا بول – بول گئدن ایملا و قیرامئر یانلیشلیقلاری دا دیلیمیزه ساغالماز ضربهلر وورا بیلر.
بو آرادا اوستان کاناللارینین آپاریجیلاری و آیری آیری مسئوللارین چیخیشلاری هابئله یئرلی مئدیالاردا گئدن وئرلیشلرین دانیشیق طرزلری ده اؤنهملی رول اویناییر. بیلمیرم، بو اوستان کانالیندا گئدن قارماقاریشیق دیلی ده سیاسی مانعلرله توجیه ائدک یوخسا آپاریجیلارین ساوادسیزلیقلارینی قابارداق! اوستان کانالیندا بوتون جومله فارسجا یالنیز جوملهنین سونوندا گئدن تورکجه فعلی اولان دانیشیقلار چوخ گؤرموشوک! آرا- سیرا گئدن بعضی اصیل تورکجه سؤزجوکلر آپاریجیلارین دوزگون دانیشماق ایستهمک مئییللرینی گؤستریر. دئمک سیاسی تاپشیریقلار چرچیوهسینده بیله بعضی سؤزجوکلر گئده بیلیر آنجاق دوزگون قیرامئری اساسیندا و اؤز یئرینده قوللانیلمیر. بو ایسه آپاریجینین باشی سویوقلوغوندان ایرهلی گله بیلر. بونو آرادان قالدیرماغا دا بیزیم الیمیزدن گلن تکجه ایش اونلارین گولونج ایفادهلری قوللانماقلارینی یایماق و اونلاری اوتاندیرماقدیر!!
یئرلی تئلویزیون کاناللاریمیزدا وئرلیشلرین باشلیغیندان باشقا تورکجه یازی گؤرمورک. بو دا مسئلهنی حل ائتمک یئرینه اونو کؤکوندن سیلمک دئمکدیر. بو کاناللاردا تورکجه یازیلماق یاساقلیغی هابئله یئنی کشف اولموش گولونج تورک دیلینده دانیشیقلاری مئعیار دیلین یارانماسینا مانع یارادان مسئلهلردن بیری اولابیلر.
داها بیر گؤزه چارپان مسئله دیلیمیزه یاد سؤزجوکلرله ایصطیلاحلارین آخیمیدیر. بیز دیلیمیزی قیرامئر باخیمیندان تمیزلهمهلیییک آنجاق بو شیددتده آلینما سؤزلرین دیلیمیزه گیرمهسی ده قبول اولونمازدیر. نه یاخشی کی دیلیمیزین یئنی سؤزجوکلریارتماغا یوخاری قابیلییتی وار. بو مسئلهنین حل اولماسیندا آیدینلاریمیزین و دیلچی عالیملریمیزین ایرهلی سورودویو اؤنهریلری ده گؤزدن کئچیرمک لازیمدیر.
جیلخا تورکجه سؤزجوکلری قوللانماغا آشیری دویغویلا یاناشماماق شرطی ایله قوجاغیمیزی دیلیمیزه گلن هر یاد سؤزجوکلره ده آچمامالیییق. بیز بو دیلی آلینما سؤزلردن تمیزلهمهلیییک آنجاق گونوموزون شراییطینی نظرده آلاراق منطیق و عاغیل ایله بو مسئلهیه یاناشماق گرهکیر.
[...]
قاباقدا 2 اسفند دونیا آنا دیلی گونونو ده اؤنجه دن تبریک دئییرم. دیل قونوسوندا هرندن یازیرساق یئنه سؤزوموزن سونو آنا دیلیمیزده مدرسهسیز اولماغیمیزا گلیب چیخیر. بلکه دئدیییم بوسؤزلر بعضیلره عجیب گله بیلر آنجاق آنادیلین وورغونلاری نه دئدیییمی باشا دوشورلر! شخصی مشغلهلریمیز تام گئجه گوندوزوموزو الیمیزدن آلدیغی حالدا یئنه ده دیلیمیز اوغروندا چالیشماق بیزی مست ائدیب آجیلاریمیزی اونوتدورور ...!
